અમદાવાદીઓ, વરસાદને શહેર પહોંચતા હજુ સમય લાગશે! જાણો કારણ

| Updated: June 21, 2022 8:21 am

ગુજરાતમાં 13 જૂનના રોજ શરૂ થવાની નિર્ધારિત તારીખ કરતાં લગભગ બે દિવસ વહેલા પહોંચતા દક્ષિણ પશ્ચિમ ચોમાસાએ રાજ્યના સૌરાષ્ટ્ર અને દક્ષિણ ગુજરાત વિસ્તારોમાં વિધિવત રીતે આગમન કર્યું છે. જો કે અમદાવાદના નાગરિકોએ હજુ પણ વરસાદની રાહ જોવી પડશે.

ભારતીય હવામાન વિભાગ (આઈએમડી)ના ગુજરાતના વડા મનોરમા મોહંતીએ જણાવ્યું હતું કે, દક્ષિણપશ્ચિમ ચોમાસું હવે વડોદરા પહોંચી ગયું છે, પરંતુ સિનોપ્ટિક પરિસ્થિતિઓની ગેરહાજરીને કારણે અમદાવાદ તરફ આગળ વધવામાં સમય લાગી રહ્યો છે. આ જણાવતા તેમણે કહ્યું હતું કે, “આવતા ત્રણ દિવસમાં (અમદાવાદમાં) આવી સ્થિતિ (વરસાદની) સર્જાવાની સંભાવના પણ ઓછી છે. જોકે સૌરાષ્ટ્ર અને વલસાડના દરિયાકાંઠાના જિલ્લાઓમાં ભારે વરસાદની સંભાવના છે.”

અત્યાર સુધીમાં અમરેલી, ભાવનગર, જૂનાગઢ અને પોરબંદર સહિત સૌરાષ્ટ્ર અને દક્ષિણ ગુજરાતના દરિયાકાંઠાના વિસ્તારોમાં વરસાદ નોંધાયો છે. જો કે, રાજ્યના મુખ્ય પ્રદેશોમાં હજુ ભારે વરસાદની રાહ જોવાઈ રહી છે, કારણ કે સૌરાષ્ટ્રમાં માત્ર 1.45 ઇંચની આસપાસ, જ્યારે દક્ષિણ ગુજરાતમાં 19 જૂન, રવિવાર સુધી લગભગ 1.44 ઇંચ વરસાદ નોંધાયો છે.

દરમિયાન સોમવારના રોજ વલસાડ જિલ્લાના ઉમરગામ તાલુકામાં 7.63 ઈંચ, વલસાડમાં 4.01 ઈંચ અને વાપીમાં 3.46 ઈંચ જેટલો વરસાદ નોંધાયો હતો. આ સાથે હવામાન વિભાગે આગામી પાંચ દિવસ રાજ્યના નવસારી, વલસાડ અને ડાંગ વિસ્તારોમાં ભારે વરસાદની આગાહી કરી છે.

Your email address will not be published.