Site icon Vibes Of India

આર્યન ખાન કેસમાં NCBના સાક્ષી પ્રભાકર સાઈલનું મોત

આર્યન ખાન કેસમાં નાર્કોટિક્સ કંટ્રોલ બ્યુરો (NCB)ના સાક્ષી પ્રભાકર સાઈલનું અવસાન થયું છે. મળતી માહિતી મુજબ પ્રભાકર રાઘોજી સાઈલનું હાર્ટ એટેકના કારણે નિધન થયું છે. ગયા વર્ષે, ક્રુઝ ડ્રગ્સ કેસમાં બોલિવૂડ અભિનેતા શાહરૂખ ખાનના પુત્ર આર્યન ખાનની ધરપકડ પછી પ્રભાકર સાઇલ ચર્ચામાં આવ્યા હતા અને NCBના તત્કાલિન મુંબઈ ઝોનલ ડિરેક્ટર સમીર વાનખેડે પર ગંભીર આરોપો લગાવ્યા હતા.

પ્રભાકર સૈલે એનસીબી કોર્ટમાં એફિડેવિટ દાખલ કરીને દાવો કર્યો હતો કે ક્રુઝ ડ્રગ્સ કેસમાં ફસાયેલા આર્યન ખાનને છોડાવવા માટે શાહરૂખ ખાનની મેનેજર પૂજા દદલાની, કેપી ગોસાવી અને સેમ ડિસોઝા વચ્ચે 25 કરોડ રૂપિયાની ડીલ થઈ હતી. 18 કરોડમાં કરાર થયો હતો. જેમાં આ સમગ્ર પ્રકરણમાં કાર્યવાહી કરનાર સમીર વાનખેડેને 8 કરોડ રૂપિયા આપવાના હતા. કેપી ગોસાવી એ જ વ્યક્તિ છે જેની આર્યન ખાન સાથે સેલ્ફી લેતી તસવીર સોશિયલ મીડિયા પર વાયરલ થઈ હતી.

NCBને ચાર્જશીટ દાખલ કરવા માટે 60 દિવસનો વધારાનો સમય
અગાઉ 1 એપ્રિલે મુંબઈની વિશેષ અદાલતે નાર્કોટિક્સ કંટ્રોલ બ્યુરો (NCB)ને ફિલ્મ અભિનેતા શાહરૂખ ખાનના પુત્ર આર્યનને સંડોવતા ક્રૂઝ ડ્રગ્સ કેસમાં ચાર્જશીટ દાખલ કરવા માટે 60 દિવસનો સમય આપ્યો હતો. . NCBએ કોર્ટમાં અરજી દાખલ કરીને ચાર્જશીટ દાખલ કરવા માટે 90 દિવસનો વધારાનો સમય માંગ્યો હતો. અરજીમાં એનસીબીએ દાવો કર્યો હતો કે આ મામલાની તપાસ હજુ ચાલી રહી છે. તેથી તેને ચાર્જશીટ દાખલ કરવા માટે વધુ સમયની જરૂર છે.

જજ વી.વી. પાટીલે કેસ સંબંધિત બંને પક્ષોને સાંભળ્યા બાદ NCBને 90 દિવસના બદલે 60 દિવસનો વધારાનો સમય આપ્યો હતો. નિયમો અનુસાર, NCBએ 180 દિવસમાં આરોપીઓ સામે ચાર્જશીટ દાખલ કરવી જોઈએ. આ સમયમર્યાદા 2 એપ્રિલે પૂરી થઈ રહી હતી. આ કેસમાં NCBએ આર્યન ખાન સહિત 20 આરોપીઓની ધરપકડ કરી હતી. જેમાં માત્ર 2 આરોપીઓ સિવાય આર્યન ખાન સહિત અન્ય 18ને કોર્ટમાંથી જામીન મળ્યા છે.