ગુજરાત અને ન્યુ સાઉથ વેલ્સ વચ્ચે વ્યાપારી સંબંધો નવા સ્તરે લઈ જવાશેઃ ભુપેન્દ્ર પટેલ

| Updated: July 27, 2022 3:57 pm

મુખ્યમંત્રી ભૂપેન્દ્ર પટેલની સૌજ્ન્ય મુલાકાત ન્યૂ સાઉથ વેલ્સના મિનીસ્ટર ફોર એન્ટરપ્રાઇઝ, ઇન્વેસ્ટમેન્ટ એન્ડ ટ્રેડ તથા મિનીસ્ટર ઓફ ટુરિઝમ એન્ડ સ્પોર્ટસ તેમજ મિનીસ્ટર ઓફ વેસ્ટર્ન સિડની શ્રીયુત સ્ટુઅર્ટ અયરેસ (Mr. Stuart Ayres) અને પ્રતિનિધિમંડળે ગાંધીનગરમાં લીધી હતી. ગુજરાત અને ન્યૂ સાઉથ વેલ્સ વચ્ચે 2018 માં જે સિસ્ટર સ્ટેટ તરીકે એગ્રીમેન્ટ થયેલા છે તેના પરિણામે બેય પ્રદેશો વચ્ચે સહકારિતાનો સેતુ વધુ સુદ્રઢ અને વિસ્તૃત બન્યો છે. તેનો આનંદ તેમણે આ મુલાકાત દરમ્યાન વ્યક્ત કર્યો હતો.

મુખ્યમંત્રી ભૂપેન્દ્ર પટેલે જણાવ્યું કે, શિક્ષણ, પ્રવાસન, બિનપરંપરાગત ઊર્જા સહિતના ક્ષેત્રોમાં ગુજરાતની જે અગ્રેસરતા છે તેમાં ન્યૂ સાઉથ વેલ્સની સહભાગીતા નવા પરિમાણો ઉમેરી શકે તેમ છે. વડાપ્રધાન નરેન્દ્ર મોદીએ હરેક ક્ષેત્રે આત્મનિર્ભર ભારતની નેમ સાથે વૈશ્વિક પ્રવાહોને સાથે રાખીને વિકાસની નવી દિશા આપી છે. મેઇક ઇન ઇન્ડીયા, મેઇક ફોર ધ વર્લ્ડનો એમણે જે વિચાર આપ્યો છે તે સૌની ભાગીદારીથી આગળ વધવાનો અભિગમ છે.

ગુજરાત અને ન્યૂ સાઉથ વેલ્સ આ વિચારને આગળ ધપાવતાં સિસ્ટર સ્ટેટ તરીકે જે ક્ષેત્રોમાં હજુ વધુ સુદ્રઢ સેતુ સ્થાપવો હોય તેમાં આગળ વધી શકે તેમ છે. શ્રીયુત સ્ટુઅર્ટ અયરેસ (Mr. Stuart Ayres) એ આ અંગેનો પ્રતિસાદ આપતાં ઉમેર્યુ કે, તેમના રાષ્ટ્રનું એક બિઝનેસ ડેલિગેશન દર વર્ષે ભારત અને ગુજરાતની મુલાકાતે આવશે અને પરસ્પર વ્યાપારિક વાણિજ્યીક સંબંધોને વધુ આગળ ધપાવશે.

તેમણે મુખ્યમંત્રીને સિડનીની મુલાકાતે આવવાનું ભાવભર્યુ આમંત્રણ પણ આ તકે પાઠવ્યું હતું. વાયબ્રન્ટ ગુજરાત ગ્લોબલ સમિટની અગાઉની સિરીઝમાં ઓસ્ટ્રેલિયા ડેલિગેશને ભાગ લીધો હતો અને હવે કોવિડ-19 પછીની સ્થિતીમાં યોજાનારી આગામી સમિટમાં પણ તેઓ સહભાગી થવા ઉત્સુક છે. એટલું જ નહિ ગુજરાતમાં મૂડીરોકાણ અને વેપારની જે અનેક તકો રહેલી છે તેનાથી તેઓ પ્રભાવિત થયા છે.

મુખ્યમંત્રી ભૂપેન્દ્ર પટેલે ઓસ્ટ્રેલિયન ડેલિગેશનને સ્ટેચ્યુ ઓફ યુનિટિની મુલાકાત લેવાનું ભાવભર્યુ આમંત્રણ પણ પાઠવ્યું હતું. મુખ્યમંત્રીએ સ્ટેચ્યુ ઓફ યુનિટિની પ્રતિકૃતિ સ્મૃતિચિન્હ રૂપે આ ડેલિગેશનને ભેટ આપી હતી. આ સૌજ્ન્ય મુલાકાત બેઠકમાં ઉદ્યોગ વિભાગના અધિક મુખ્ય સચિવ રાજકુમાર, મુખ્યમંત્રીના અધિક મુખ્ય સચિવ પંકજ જોષી, ઉદ્યોગ કમિશનર રાહુલ ગુપ્તા વગેરે જોડાયા હતા.

Your email address will not be published.