પિતરાઇ ભાઇનું અકાળ મૃત્યું યુવાનને સંયમ માર્ગ તરફ લઇ ગયું

| Updated: April 22, 2022 12:24 pm

24 વર્ષનાં હર્ષિત ભણસાલીનાં જીવનમાં કોઇ કમી ન હતી. મુંબઈનાં વતની હર્ષિતનાં પિતા મુંબઇમાં ડાયમન્ડ માર્કેટમાં બિઝનેસ કરે છે. હર્ષિત 2015થી બેંગલુરુમાં તેના મામાના પરિવાર સાથે રહેતો હતો. કોમર્સ ગ્રેજ્યુએટ હર્ષિત ચાર્ટર્ડ ફાઇનાન્શિયલ એનાલિસ્ટ (સીએફએ) એન્ટ્રન્સ ટેસ્ટની તૈયારી કરી રહ્યો હતો અને ફાઇનાન્સમાં સફળ કેરિયર સાથે યુએસમાં સ્થાયી થવાનાં સપનાં જોતો હતો.

જો કે એક બનાવે તેનું જીવન પલ્ટી નાખ્યું. 2019ના અંતમાં તેનાં મામીનાં પુત્ર અને ખાસ મિત્ર નમન કોઠારીના મૃત્યુએ તેને હચમચાવી દીધો. હર્ષિત કહે છે કે, મેં ફાઇનાન્સ, ઇન્વેસ્ટમેન્ટ બેંકિંગ અને કેપિટલ માર્કેટમાં કેરિયર બનાવવા માટે વિદેશ જવાનું પ્લાનિંગ કર્યું હતું, પરંતુ નમનનું મૃત્યુ અત્યંત આઘાતજનક હતું. લોકડાઉનમાં પણ હું તે ભુલી શક્યો નહીં અને હું જે ડિપ્રેશનમાંથી પસાર થઈ રહ્યો હતો તે વધી રહ્યું હતું.

અમદાવાદના સાબરમતી ખાતે ગુરુવારે આચાર્ય રશ્મિરત્નસૂરિની નિશ્રામાં દીક્ષા લેનારા ચાર યુવકો હર્ષિતનો પણ સમાવેશ થાય છે. જ્યારે તે પિતરાઈ ભાઈના મૃત્યુને કારણે આવેલા ડિપ્રેશન સામે લડતો હતો, ત્યારે તેણે લોકડાઉન લખતે વાંચેલા પુસ્તકોથી તે આધ્યાત્મિકતાના માર્ગે વળ્યો હતો.

તેનાં મામી મમતા કોઠારીએ કહ્યું કે જ્યારે હર્ષિતે કહ્યું કે તે દીક્ષા લઇને જૈન સાધુનું જીવન જીવવા માંગે છે ત્યારે તેઓ ચોંકી ગયા હતા. નમનના મૃત્યુ પછી આ બીજો આઘાત હતો. બેંગલુરુમાં 400 કરોડ રૂપિયાનું વાર્ષિક ટર્નઓવર ધરાવતી અમારી ફાર્મા ડિસ્ટ્રિબ્યુશન ફર્મ છે. અમને આશા હતી કે તે ફર્મને સંભાળી લેશે. અમે શરૂઆતમાં તેને દીક્ષા લેવા સંમતિ આપી ન હતી.

જોકે હર્ષિત એકદમ મક્કમ હતો. હર્ષિત કહે છે કે અકસ્માત એટલો ભયાનક હતો કે તે (નમન) થોડી જ મિનિટોમાં મૃત્યુ પામ્યો હતો. કોઈ શક્તિ તેને એક વધારાનો શ્વાસ લેવામાં મદદ કરી શકી ન હતી. તેનાથી મારા મગજમાં અનેક પ્રશ્નોના ઘૂમરાયા હતા. મને કેટલાક ધાર્મિક ગ્રંથોમાંથી કેટલાક જવાબો મળ્યા પછી શાંતિ મળી. ભૌતિક સંપત્તિ અથવા આરામનો અર્થ મારા માટે હવે ઓછો થઇ રહ્યો હતો. આચાર્ય અને વરિષ્ઠ સાધુઓએ તેના માતા-પિતા અને મામા-મામીને દીક્ષા લેવા માગતા હર્ષિતને ન રોકવા સમજાવ્યા હતા.

આખરે ગુરુવારે હર્ષિતને તેની નવી ઓળખ મળી. હર્ષિતની સાથે જેમણે દીક્ષા લીધી તેમાં મુંબઈના ભુલેશ્વરના ખુશ જૈન(19), મુંબઈના ભાયંદરના ભૌતિક બલદિયા (18) અને મુંબઈના રાકેશ જીવાવત (38)નો સમાવેશ થાય છે. રાકેશ અપરણિત છે અને 18 વર્ષની ઉંમરથી સાધુ બનવાની તેની ઇચ્છા હતી. પરંતુ તેના ગુરુઓએ પરિવારની સંમતિનો આગ્રહ રાખ્યો હતો. રાકેશ પ્લાસ્ટિકનું એક યુનિટ ચલાવતો હતો. જ્યારે પરિવારને સમજાયું કે તે સંયમ માર્ગે જ આગળ વધવા માગે છે ત્યારે તેમણે દીક્ષા લેવાની મંજૂરી આપી.

Your email address will not be published.