નવનીત રાણાએ મહારાષ્ટ્ર પોલીસ પર લગાવેલા ગંભીર આરોપો સામે હવે મુંબઈ પોલીસ કમિશનરે પલટવાર કર્યો છે. મુંબઈ પોલીસ કમિશનર સંજય પાંડેએ એક સીસીટીવી ફૂટેજ શેર કર્યું છે. જે ખાર પોલીસ સ્ટેશનનું કહેવાય છે. જેમાં અપક્ષ સાંસદ નવનીત રાણા, પતિ અને ધારાસભ્ય રવિ રાણા પોલીસ સ્ટેશનમાં બેસીને ચા/કોફી પીતા જોવા મળે છે.
જણાવી દઈએ કે આ પહેલા નવનીત રાણાએ લોકસભા સ્પીકરને પત્ર લખ્યો હતો, જેમાં તેમણે મુંબઈ પોલીસ પર ગંભીર આરોપ લગાવ્યા હતા. એવું કહેવાય છે કે પોલીસે તેના પર જાતિવાદી ટિપ્પણી કરી હતી. આટલું જ નહીં, નવનીતે કહ્યું હતું કે પોલીસે તેને પીવાનું પાણી આપ્યું ન હતું અને બાથરૂમનો ઉપયોગ પણ કરવા દીધો ન હતો.
શું લખ્યું નવનીત રાણાએ સ્પીકરને પત્રમાં?
સોમવારે નવનીત રાણાએ લોકસભા સ્પીકર ઓમ બિરલાને પત્ર લખ્યો હતો. નવનીત રાણાએ પત્રમાં લખ્યું છે કે મને 23મીએ પોલીસ સ્ટેશન લઈ જવામાં આવી હતી. 23 એપ્રિલના રોજ મારે આખી રાત પોલીસ સ્ટેશનમાં જ વિતાવવી પડી હતી. મેં રાત્રે ઘણી વખત પાણી માંગ્યું, પરંતુ મને આખી રાત પાણી આપવામાં આવ્યું ન હતું. નવનીતે આગળ મોટો આરોપ લગાવતા કહ્યું કે સ્થળ પર હાજર પોલીસ સ્ટાફે કહ્યું કે હું અનુસૂચિત જાતિની છું, તેથી તેઓ જે ગ્લાસમાં પાણી પીવે છે તે જ ગ્લાસમાં મને પાણી આપી શકતા નથી. મતલબ કે મારી જાતિના કારણે મને પીવા માટે પાણી પણ આપવામાં આવ્યું ન હતું. હું ભારપૂર્વક કહેવા માંગુ છું કે મારી જાતિના કારણે મને મૂળભૂત માનવ અધિકારોથી વંચિત રાખવામાં આવ્યા છે.
નવનીત વધુમાં કહે છે કે મારે રાત્રે બાથરૂમ જવું પડતું હતું, પરંતુ પોલીસ સ્ટાફે મારી માગણી પર ધ્યાન આપ્યું ન હતું. પછી મારી સાથે દુર્વ્યવહાર કરવામાં આવ્યો. એવું કહેવામાં આવ્યું હતું કે તેઓ (પોલીસ સ્ટાફ) નીચલી જાતિના લોકોને તેમના બાથરૂમનો ઉપયોગ કરવા દેતા નથી.
શું છે ઘટના
લાઉડસ્પીકર વિવાદ વચ્ચે રાણા દંપતીએ શુક્રવારે ઉદ્ધવ ઠાકરેના ઘર ‘માતોશ્રી’ની બહાર હનુમાન ચાલીસા વાંચવાની જાહેરાત કરી હતી. રાણા દંપતીની આ જાહેરાત બાદ સવારથી જ શિવસૈનિકો તેમના ઘરની બહાર મોટી સંખ્યામાં ઉમટી પડ્યા હતા. તેઓએ આખો દિવસ રાણે દંપતીના ઘરની બહાર હોબાળો મચાવ્યો હતો. શિવસૈનિકોએ રાણે દંપતી પર ધાર્મિક ભાવનાઓને ઠેસ પહોંચાડવાનો આરોપ લગાવ્યો હતો. પોલીસમાં નોંધાવેલી ફરિયાદમાં શિવસૈનિકોએ કહ્યું કે માતોશ્રી તેમના માટે મંદિર સમાન છે. શિવસૈનિકોએ કહ્યું કે રાણા દંપતીએ તેમની ભાવનાઓને ઠેસ પહોંચાડી છે.
શિવસૈનિકોની ફરિયાદ બાદ પોલીસે IPC કલમ 153A (ધર્મ, જાતિ અથવા ભાષાના આધારે બે જૂથો વચ્ચે દુશ્મનાવટને પ્રોત્સાહન આપવું) હેઠળ કેસ નોંધ્યો અને રાણા દંપતીની ધરપકડ કરી. ત્યારબાદ તેઓને જેલમાં મોકલી દેવામાં આવ્યા હતા.
મંગળવારે સેશન્સ કોર્ટમાં નવનીત રાણા અને રવિ રાણાના જામીન પર સુનાવણી હાથ ધરવામાં આવી હતી, પરંતુ હજુ સુધી તેમને રાહત મળી નથી. બંનેને હાલ જેલમાં જ રહેવું પડશે. સેશન્સ કોર્ટમાં કેસની આગામી સુનાવણી 29 એપ્રિલે થશે.
